MAHAKAMA YAOMBWA KUKATAA OMBI LA KUIFUTA KESI YA SHEIKH PONDA

Maombi ya Katibu wa Jumuiya na Taasisi za Kiislamu Tanzania, Sheikh Issa Ponda ya kuomba ufutiwa shtaka la kukiuka uamuzi wa mahakama, yamebaki njiapanda baada ya Jamhuri kuyawekea pingamizi la kisheria, ikiiomba Mahakama Kuu Kanda ya Dar es Salaam iyatupilie mbali.

Wakili Mkuu wa Serikali, Bernard Kongola alidai hayo jana mbele ya Jaji Rose Temba kabla ombi hilo halijaanza kusikilizwa. Katika ombi hilo, Shekhe Ponda anaiomba Mahakama ifanye marejeo ya uamuzi wa Mahakama ya Hakimu Mkazi Morogoro, uliokataa kumfutia mashitaka ya kukiuka amri ya Mahakama.

Akiwasilisha hoja zake, Wakili Kongola alidai ombi hilo ni batili kwa kuwa kiapo kinachounga mkono kina mapungufu, kinyume na Kifungu cha 8 cha Sheria ya Viapo.

Alidai kuwa upungufu huo ni kutokuwepo kwa tarehe katika kiapo hicho, kilichoapwa na Wakili Hamidu Ubaidi. Pia, alidai kiapo hicho hakijaeleza kama aliyeapa, alifanya hivyo mbele ya wakili anayemfahamu.

Alidai upungufu huo hauwezi kurekebishwa, hivyo ni kama hakijawasilishwa na kuiomba Mahakama ione ombi hilo ni batili na halijawasilishwa kwa mujibu wa sheria.

Wakili wa Ponda, Nassoro Juma aliomba Mahakama itupilie mbali pingamizi hilo kwa kuwa halina msingi kisheria, bali ni maelezo, na kuangalia ombi hilo kwa jicho la haki na siyo kiufundi.

Aidha, alidai pingamizi hilo limewasilishwa kwa nia ya kuchelewesha kesi ili mshitakiwa aendelee kukaa rumande na kesi inayomkabili, isiendelee.

Alidai kuwa hakuna upungufu wowote katika kiapo hicho, kwa kuwa kinaonesha kilichukuliwa Oktoba 8, mwaka huu na ombi hilo liliwasilisha Oktoba 10, mwaka huu.

Alidai kiapo kilichowasilishwa, kina tarehe na wakili aliyeapa alifanya hivyo mbele ya Wakili anayemfahamu na inawezekana katika nakala za upande wa Jamhuri, inaonekana kina upungufu, lakini Mahakama inaongozwa na nyaraka zilizo kwenye kumbukumbu za mashauri.

Jaji Temba aliahirisha shauri hilo hadi Desemba 11, mwaka huu, atakapotoa uamuzi wa kusikiliza au kutupilia mbali ombi hilo. Ponda anadaiwa kukiuka amri ya Mahakama ya Hakimu Mkazi Kisutu, iliyomtaka kutotenda kosa kwa mwaka mmoja, na kutotoka nje ya Mkoa wa Dar es Salaam bila kibali cha Mahakama.

Hata hivyo, Shekhe Ponda aliomba mashitaka hayo yafutwe katika Mahakama ya Morogoro au yahamishiwe katika Mahakama iliyotoa amri hiyo, kwa kuwa Mahakama hiyo ya Morogoro haina mamlaka ya kusikiliza